الشمس تتوراي خلف السحب ،والجو يزداد بروده
-(شكلها كدا هتمطر ) ..قالتها تلك السيده الاربعينيه كبدايه لحديث..
-(اه فعلا ..يارب نخلص قبل ما تمطر ..عشان مش هينفع انزل بكره تاني واقف ساعتين تلاته كدا برده )
-(عندك حق ..الوقفه متعبه اوي ..وممله كمان ،،صحيح يا حاجه ..هتنتخبي مين ...؟)
لم ترد الاجابه ..لكي لا تفتح بابا للجدل خصوصا ان الاخري كانت تمسك بيدها اعلان لحزب الحريه والعداله ...ولكن ما ان رأت علي وجهها عبارة (براحتك يا ختي )..
-نطقت سريعا ..(ربنا يولي من يصلح )
-(يارب ..مين يعني .؟؟)
-اما انتي وليه غلسه صحيح ..(الثوره مستمره ان شاء الله )
-(ايه ..؟...مين دول .؟)
-(دول شباب الثوره )
-(قلتيلي ...بتوع المظاهرات وكدا ..)ولسا هتكمل وتقول (اللي خربوا البلد )
-(مالهم بتوع المظاهرات ..مش هما دول اللي عملوا الثوره وخلصونا من مبارك وعصابته )
-(مش قصدي يا حاجة ...انتي زعلتي كدا ليه ...انا اقصد انهم شباب صغير ومعندهمش خبره ..وكمان مش هما لوحدهم اللي عملوا الثوره ..ما الاخوان من اول يوم في الثوره ...وبقالهم سنين طويله ...بيعارضوا النظام ..هو اللي اتعمل فيهم شويه ..!!.وكمان بتوع الثوره دول محدش سمع عنهم ...صعب اوي انهم يكسبوا ..ادي صوتك لحد يستفيد بيه )
وتركتها ...لتفتح حديث مع اخري تقف امامها
تركتها تفكر ..وتحتار مره اخر ..أتنتخب الاخوان ذوي الخبره والتاريخ النضالي ...؟؟من تأمل فيهم خيرا ...ام كما نصحها ولدها علي ..."الثوره مستمره "..وان الاخوان سرقوا الثوره وانهم انتهازيون ومحبين للسلطه ...محتاره ومش عارفه تختار مين ...؟
مره واحده التليفون رن ..
-الو ..
-السلام عليكم
-وعليكم السلام ورحمه الله وبركاته ..ازيك يا مروه ..عامله ايه ...
-تمام الحمد لله يا ماما ..ايه انتخبتي ولا لسا..؟
-لسا واقفه في الطابور اهو
-ماشي يا ماما اما تخلصي ابقي طمنيني ..وما تنسيش حزب النور رمز الفانوس ...
-حاضر ...هشوف كدا ...
-ولو مش عاجبك حزب النور ..ادي الاخوان ...المهم يكون حد عايز يقيم شرع الله ...وعشان خاطري يا ماما ..اوعي تسمعي كلام خالو وتدي صوتك للكتله ...الناس دي عايزه تمحي الدين بتاعنا ...وامريكا واسرئيل بتساعدهم علي كدا ...
اتفقنا يا ماما ؟
-اتفقنا
بعد المكالمه بدأت الام تميل قليلا ...للاخوان ...بالاضافه الي ان المرأه التي تقف امامها مستمره في الحديث عن قوه الاخوان وخبرتهم وبرامجهم و..و...
ورن التليفون مره تانيه ...
-الو ..ازيك يا دكتور عامل ايه
-الحمد لله تمام ...ايه يا ام علي انتخبتي ولا لسا ...
-واقفه في الطابور اهو ...
-تمام اما تخلصي ابقي طمنيني عليكي ...وما تنسيش الكتله المصريه زي ما قلتلك...والله يا علي ..
-ايه
-انا كنت مقتنعه بيها ...بس بعد اللي سمعته عن سويرس والفلوس بتاعت امريكا واسرائيل ..غيرت رأيي
-امريكا واسرائيل ايه بس ..دي كلها اشاعات مطلعها الاخوان والسلفيين عشان الكتله عامل لهم زي الشوكه في الزور..عايزين محدش ينافسهم ...يحطوا الدستور علي مزاجهم ..يسيطروا ع الاقتصاد ..يطلعوا عقدهم النفسيه علينا ...و..لمده 10 دقائق استمرت المكالمه ....ولانها تثق في رأي اخيها الدكتور علي وفي معلوماته واراؤه السياسيه ..بدأت تميل لاختيار الكتله
وبدأ الصف يتحرك ..وتقترب من باب اللجنه ...ومازالت تفكر
من تختار؟؟
الاخوان ذوي الخبرة...الانتهازيون كما يصفهم علي ..
ولا الدين اللي بيأمرها بانتخاب حزب النور زي ما مروه قالتلها ....ولا الكتله المصريه ...اللي هتحمي مصر من تشدد السلفيين وطمع الاخوان زي ما الدكتور بيقول ....ولا شباب الثوره الغلبان اللي ثورته اتسرقت ....بس صعب اوي انه ينجح ...ظلت في حيره شديده ...الي ان وقفت امام استماره الانتخابات ...وحسمت امرها ..وقالت خير الامور الوسط ...واختارت حزب الوسط
--------------------
عزيزي القارئ
أمي اللي مالهاش في السياسه ..وامك اللي كل خبرتها في الحياه من زميلاتها في الشغل ...وعم عصام البقال ..والراجل اللي بيركب جنبك الميكروباص ويحسسك ان مفيد فوزي قاعد معاك .....دول كلهم بيمثلوا رمانه الميزان اللي بتنجح اي انتخابات في الدينا
ليست هناك تعليقات:
إرسال تعليق