يعلم هذا المخبول جيدا ان السبب ليس الشراره ..انما البنزين الذي استمر سكبه لسنوات طويله ....وصدق فريد الديب حين قال "الثوره دي كانت برعايه السيد الرئيس "
نزول الملايين للشارع في جمعه الغضب لم يكن فقط بسبب ما شاهدوه علي قناه الجزيره من قتل وقمع للمتظاهرين ايام 25 و26 و27 يناير ...بل هناك أسباب انكي واقوي من ذلك بكثير ...أسباب كانت بمثابه البنزين ..الذي بمجرد أن "شم " الشراره حتي اشتعلت ثوره الغضب ...
اسباب من بينها البطاله وازمه السكن والفقر وغلاء الاسعار واستغلال الحكومه واستهبال الشرطه و"الكوسه" التي اصبحت سمه مميزه لكل مؤسسات الدوله من تعليم وصحه ومؤسسه قضائيه و داخليه وحربيه "ولا بلاش الحربيه "...والفساد او بالاحري الطاعون اللي اصبح وجوده امر مسلم به ...من اول القصر الجمهوري ورئاسه الوزراء حتي طابور العيش
اذن غياب العداله الاجتماعيه ..ادي لقيام الثوره ...
و مشاهده المخلوع في القفص ..ليس مؤشرا لنجاح الثوره كما يعتقد البعض ..فالثوره لا تنجح الا بأن تكتمل ..ولا تكتمل الا بتحقيق اهدافها ....بهدم دوله الفساد ..واقامه دوله العدل .."حريه وعداله اجتماعيه "
*"بس انت مهتم بموضوع العداله الاجتماعيه..؟...ما انت زي الفل ومستريح ماديا ومستواك الاجتماعي كويس ...ليه يعني مركز اوي علي حته العداله دي .."
* بعيدا عن انك بتتكلم من منظور اناني وان دي مش مثاليه ولا رومانسيه مني ان افكر في اللي حواليه ..وان كل الاديان اوصت بالعداله الاجتماعيه ...بعيدا عن كل دا انا هكلمك بلغه المصلحه ..اللي بتفهمها ..
اولا ...العداله الاجتماعيه ضمان لسلامه وتماسك المجتمع ....هتقلي ..ازاي ؟؟
-..الطفل اللي بيسرح بمناديل في الاشارات ..واللي ممكن يسرق اي حاجه من عربيتك لو غفلت عنه لحظه ...لو فيه عداله اجتماعيه ...استحاله يسرقك ...عارف ليه ...لانه مش هيكون موجود في الاشاره اصلا ..دا هيكون قاعد في فصل جوه مدرسه وبيتعلم ....
-...معظم المجرمين والبلطجيه ان ما كانش كلهم ...اتجهوا للطريق دا بسبب الفقر والبطاله ...
-وكمان ما سألتش نفسك ليه ..الزكاه في الاسلام واجبه ..مش محببه ...لا دي ركن من اركان الدين كمان ...ليه ...الدين يكفل للفقير حق في مال الغني ....الدين بيديله بالحسني فلوس تساعده ع الحياه ..بدل ما يتجه للسرقه او النصب ...الخ ..
...........
ثانيا ..العداله الاجتماعيه هي الطريق للحريه ....ازاي ..؟؟
لو عندك عداله اجتماعيه ..هل حد هيبيع صوته الانتخابي بكرتونه بيض ولا خمسين جنيه
لو كل واحد عارف ان مفيش سلطه في البلد دي غير للقانون ...هل هيخاف يعارض او يعبر عن رأيه ....؟؟...هل هيفضل ماشي جنب الحيط ..؟
..........
ثالثا ..العداله الاجتماعيه هي سبب مهم للتقدم ...ووسيله قويه نرجع بيها لمصر مكانتها ....ازاي ..؟
..مش هشام الجخ بيقول ..".اما علمك ما يلاقيش ياكل فيطفش ...."..
هو دا بالظبط علماء كتير ..هاجرو وعملوا نهضه ونقله علميه في بلاد تانيه ...عشان اسباب تافهه ...مرتبه ضعيف ...الدوله مش مهتمه بيه ..واحد اقل منه ياخد مكانه في الترقيه او البعثه ...طبعا بفضل الواسطه والكوسه ...
وغير العلماء اللي هاجرو ...علماء تانيين اتحولوا لمدمنيين ومجرمين ...لانهم ما لاقوش الفرصه ....او مالاقوش ياكلوا بالمعني الاصح ....وياما اطفال عباقره قتلهم الجوع والمرض ...وموهوبين كتير وفنانيين اندفنوا بالحياه ..ومحدش سمع عنهم ..عشان مالاقوش حد يتبناهم ...وامثله كتير ..كانوا ممكن يفيدو البلد لو البلد ساعدتهم ووقفت جنبهم ووفرت ليهم اقل متطلبات الحياه ...
ايه...؟
اقتنعت ..ولا اقول كمان ...؟
**اقتنعت ...بس مش عارف ليه ..بدأت احس انك شيوعي ..!!
-ههههههه لا ياعم انا مش شيوعي ولا حاجه ...انا مش بقلك الوزير ياخد زي الغفير ....انا بطلب ان الغفير يعيش حياه كريمه ...وان ابن الغفير من حقه تعليم وصحه وبرنامج غذائي زي ابن الوزير بالظبط
.................
"نحلم يدوله ..يكون القانون ..سيدها ورجلها القوي وزعيمها الملهم .....دوله تكفل لكل مولود مقعد في مدرسه وسرير في مستشفي ومسكن نظيف وبرنامج غذائي "
ليست هناك تعليقات:
إرسال تعليق